AFUNGWA MAISHA JELA KWA KUMNAJISI BINTI YAKE KATAVI...

Mkazi wa mtaa Kigamboni, Kata ya Shanwe mjini Mpanda, Katavi , Abisai Joseph (40)  ametiwa  hatiani na Mahakama ya Hakimu wa Wilaya  ya Mpanda  na kuhukumiwa kifungo  cha  maisha jela kwa kosa la kunajisi mtoto wake  mwenye umri wa miaka  sita.

Akisoma  hukumu  hiyo  Jumatatu, Hakimu Mfawidhi wa Mahakama hiyo, Chiganga Tengwa,  alisema ameridhika  pasipo shaka na ushahidi  uliotolewa  na upande  wa mashitaka ukiongozwa  na Mwendesha Mashitaka, Ally Mbwijo.
“Mahakama  hii pasipo shaka yoyote  hivyo imekutia hatiani  mshitakiwa  kwa kuvunja sheria , hivyo  utatumika  maisha  yako yote  jela  ili iwe  fundisho  kwa  wengine  wenye nia na tabia ya kufanya  uovu  huo  ulioufanya  mshitakiwa,” alisema  Hakimu Tengwa.
Awali, Mwendesha Mashitaka , Mkaguzi  wa Polisi  Mbwijo,  alidai  mahakamani hapo  kuwa  mshitakiwa  alitenda kosa hilo Desemba 18, mwaka jana  saa tano  usiku,  akiwa  nyumbani  kwake mtaa wa Kigamboni.
Akiiambia Mahakama, kuwa usiku  wa  tukio, mshitakiwa  alimnajisi  binti yake huyo aliyekuwa  amelala  na mdogo wake  chumbani, baada  ya kumvizia akiwa anatoka  nje ya  nyumba hiyo  peke yake  kujisaidia.
Ilidaiwa  mahakamani  hapo  kuwa  mzazi  huyo alimvamia  binti  yake  na kumtendea unyama  huo  huku mtoto  akilia  kwa uchungu  lakini  mama  yake  aliyekuwa amelala  chumbani  hakusikia kelele   kwa kuwa  ana tatizo la kutosikia  vizuri.
Mwendesha Mashitaka  huyo  aliendelea  kuiambia  Mahakama, kuwa baada ya  mshitakiwa  kumtendea  unyama  mtoto  huyo,  alimwamuru  aingie  ndani  kulala,  lakini  aliendelea kulia  kutokana na  maumivu  hata  mama  yake kumsikia na kumhoji mumewe  kulikoni, akamjibu alikuta  binti yao  huyo akibakwa nje ya  nyumba yao.
Ilielezwa  mahakamni  hapo  kuwa  baada ya kusikia  maelezo ya mumewe  aliwaarifu  majirani ambao  walimshauri  na kumsindikiza  kwenda kutoa  taarifa hiyo Polisi ambako  mtoto  huyo alikana kubakwa nyumba jirani na kumtaja baba yake kuwa ndiye amemtendea  unyama  huo.
Mama huyo ambaye  alikuwa shahidi  muhimu  katika shauri  hilo, katika  ushahidi wake  aliiomba  Mahakama  imsamehe  mumewe  kwa kumpa adhabu  ndogo.
Na baada ya mumewe kuhukumiwa  mama  huyo  aliyefuatana mahakamani hapo na  bintiye  mdogo  alimsihi  binti huyo waagane na baba yake lakini alimkatalia kwa alichokieleza ni kutofurahishwa na unyama aliomtendea dada yake.